උලමුන් කෑගසන බියකරු රෑ කාලේ
රුවක් දුටිමි මම දැන් අන්තර් ජාලේ
සුර කෙල්ලක් වගෙයි වඩවන මන ලෝලේ
දැක්කද ඔබත්, කොහොමද සූකිරි බෝලේ
සඳ කිඳුරියොත් පරදා ලූ මහඟි රුව
තැබුවා සේය හිත මත ඊයම් බරුව
දැක්කත් හිත පිරෙන අඟනකි ඇති සරුව
වහගෙන ඇයිද රෙදි පටියෙන් තනි තරුව
රිය සක පරාදයි හැඩයට උඹෙ උකුලේ
බොරුවක් නොවෙයි එය නාඹර මල් කැකුලේ
මටත් හොරෙන් මගෙ හිත යයි මල් අකුලේ
නැලෙවුවොත් මොකද දරුවෙක් ඔය උකුලේ
රෑන කිතුල් මල සේ දිසි රන් වරල
ඊට යටින් රන් වන් සුදු මුදු නලල
හිත ගැස්සෙයි දුටුවම ඔය නෙත් සඟල
හන්ස යුවල ඇයි මේ තරමට ධවල
රතදර යුවල දුටුවම හරි සරාගික
එහි ඇඳි මදහාස පෙනුමද නුරාගික
වරක් දුටොත් නොව පතනුය අගාරික
සිලුත් බිඳෙයි තවුසන් සිත විරාගික
ඇතොත් කෙනෙක් ලොව දකිනා සැබෑ තතූ
දෙතිස් කුනුපයක් බව මෙය සිතිය යුතූ
නිවන් නොමැත මම මේහැටි කලින් පැතූ
ඉතින් විඳිමි සොඳුරුය මේ ළඳගෙ තතූ
No comments:
Post a Comment