අවුරුදු ගානකට එහා ගෙවපු රස්තියාදුකාර ජීවිතේදි මට හම්බෙච්ච හොඳ කල්යානමිත්‍රයො ටිකක් ඉන්නව.. අතීතෙ මතක් කරද්දි සතුටුවෙන්ඩ තියෙන කාරනාවක් තමා අපායට ගියත් තනියෙම ඉන්ඩ වෙන් නෑ කියන එක.. එහෙම හිතෙද්දි හරි සනීපයක් දැනෙනව.....
ඒ මිතුරු රැලේ ඉඳපු හිත හොඳ එකෙක් ගැනයි මේ කතාව.. උගෙ නියම නම මෙතෙන්ට අවශ්‍ය නැති නිසා මං ඌට සමන් කියන්නම්.. සියලු සමන්ල කමත්වා...
සමන් කියන්නෙ සිරා පොරක්. අමුතු චරිතයක්.. අරක්කු, සිගරැට්, ගංජ, ගුලි එක්ක ඇසුරක් නෑ.. නිතර නිතර අනිත්‍ය මෙනෙහි කරමින්, බවුන් වඩමින්, දස අකුසලෙන් වැලකෙමින්, ශාඛ බක්සකයෙක් වෙමින් අපි හැමෝටම තමන්ගෙ ජීවිතෙන් ආදර්ශ සපයපු මිත්‍රයෙක් සමන්.. ඔහු නිරන්තරයෙන් අපිට අර්ථයෙන් ධර්මයෙන් සංග්‍රහ කලා, බන කතා කියල දුන්න.. අපිව දුශ්චරිතයෙන් මුදවන්ඩ උත්සාහ කලා....
ඉඳ ඉඳ එක වෙහෙර
විඳ විඳ දහම් මනහර
සිඳ බිඳ දුක් සසර
අහෝ දෙවුදත් නොදිටි මොක්පුර....
බුදුහාමුදුරුවො එක්ක එක ආරාමෙක වාසය කරපු, නෑකමට මස්සිනා උනු දේවදත්ත තෙරුනුත් අපාගතවෙච්චි එකේ ජීවිතේ නරකම වයසෙ හිටි අපි සමන්ගෙ ධර්මානුසාසනා ඒ කනෙන් අහල මේ කනෙන් පිටකිරීම ගැන අන් කවර කතාද.....
සමන් කියන්නෙ ටිකක් දුර පලාතකින් කොළඹට සංක්‍රමනය වූ තරුනයෙක්... ගෙන්දගම් පොලවට වැටුනත් සමන්ගෙ ගැමි කම, අවංක කම, අව්‍යාජකම සමන් නැති කර ගත්තෙ නෑ..........
හැමෝටම වගේ සමන්ටත් පෙම්වතියෙක් හිටිය.. ඇයත් සමන්ගෙ ගම්පලාතෙම කෙනෙක් කියලයි සමන් කිවුවෙ... නිවාඩු දවස්වලට අනික් හැමෝම ප්‍රේම කරන්න අහු මුලු හෙවුවත් සමන් වෙනස්ම ප්‍රේමවන්තයෙක්.. ප්‍රේමය නම් රාගයෙන් තොර සඳ එලිය සේ අචින්ත්‍යයි, පාරිශුද්ධයි, සුරම්යයි...... ප්‍රේමය ගැන සමන් දරපු අදහස සුනිල් ආරියරත්නයන් ගීයට නගල තිබුනෙ ඒ විදියට.... බඳින්ඩ කලින් ප්‍රේමවන්තිය සමග කුමන හෝ අයුරකින් ඉඳුරන් සන්තර්පනය කර ගැනීම කාමයෙහි වරදවා හැසිරීමක් බවයි සමන් නිතරම කිවුවෙ..... එහෙම බැලුවම සමන් කියන්නෙ මාර චරිතයක්..... ඔහු අනෙක් අයටත් නිතර අනුසාසනා කලා කාමයෙහි වරදවා නොහැසිරෙන්න කියල....
කල්යාන මිත්‍රයො ටික ඉඳහිට වෙලාවක මදු විතක් තොලගාද්දි සමන් එතන හිටියත් කවදාක්වත් සමන් නෙවේ එක රුපියලක්වත් දුන්නෙ ඒකට... පන්සිල් කැඩීමෙන් සිද්ද වෙන පාපය ඊට අනුබලදීමෙන්ද සිද්දවෙන හින්දයි සමන එහෙම කලේ.....
හිටපියකො, අපි කවද හරි තොාග සල්ලි වලින් බොනව සමනො....
අනේ පලයන් මචන් යන්න..... මේ සමන්ගෙන් බොන්ඩ සල්ලි ගන්නවනම් බොරු....
හරි හරි බලමුකො.... කට්ටිය සමනට වෙරිපිට නක්කලේ දැම්මට සමන නෙමේ ඒවයින් සැලුනෙ.... ඌ උගෙ ප්‍රතිපත්තියෙම හිටිය ඉතා තදින්....😞😞😞
කාලය හිමින් ගලා ගියා... ඒ එක්කම සමන්ගෙ නිකැලැල් ප්‍රේමයත් ගලා ගියා....
ඔහොම යනකොට සමන්ගෙ ජීවිතේට ඉතාම කනගාටුදායක දිනයක් උදාඋනා.... කියන්න දුකයි මිත්‍රවරුනි, සමන් වගේ සත් ගුනවත් උපාසකයෙකුට උනත් දෛවය ඉතාම අකාරුනික විදියට සලකන වෙලාවල් එනව... විස්නු දෙයියොත් නරක කාලෙ ආවම බටකොල කෑවලුනෙ.....
එදා දවල් දවස ඉතාම සාමකාමීව ගෙවිල ගියා.... මධ්‍යමරාත්‍රියට හෝරාවක් විතර තියල සමන්ට එක යාලුවෙක්ගෙන් කෝල් එකක් ආව...
මචං සමනො, උඹ නිදිද...... යාලුවගෙ කටහඬේ අමුතු කලබලකාරී ටෝන් එකක් තිබුනෙ.... සමනුත් එකපාරටම ගැස්සිලා ගියා ඒ ටෝන් එකට
නෑ මචං... කියාන්
සමනො පොඩි කේස් එකක් මචං... උඹ අවුල් වෙන්නැත්නම් කියන්නම්....
නෑ බං අවුලක් නෑ... කියපන්.....
මචං සමනො උඹ ලඟදි කෙල්ලෙක් එක්ක රූම් එකකට ගියාද??? 😯😯😯
මොකක්... පිස්සුද බං.... මං එහෙම රූම් ගානෙ ගිහින් පජාති වැඩ කරන්නෑ කියල උඹල දන්නවනෙ බං....
නෑ බං සමනො.... උඹ කෙල්ලෙක් එක්ක රූම් එකක ඉන්න වීඩියෝ එකක් තියෙනවනෙ බං නෙට් එකේ... මම දැන් දැක්කෙ... මම ලින්ක් එක සේවු කරගත්ත......
මොකක්... මම
ඔවු බං, උඹ තමා... මට අඳුරන්ඩ බැරිද උඹව...
මචං.... මන් ඉවරයි බං.... අනේ මචන් උඹ අනික් උන්ටත් ඕක කිවුවද.....
පිස්සුද මචං... මං මේ දැක්ක ගමන් උඹට කෝල් කලේ.....
අනේ මචං.... අනෙක් උන්ට කියන්න එපා මචං..... අනේ මචං.... මම දැන් මොකක්ද කරන්නෙ මචං.... මට පිස්සු වගේ මචං..... මට මොනව කරන්නද කියල හිතා ගන්න බෑ මචං....
මෙන්න මේ ආකාරයට අපේ අති ගෞරවනීය, වන්දනීය, පූජනීය සමන්තුමාගේ චරිතය මණ්ඩුක භවනෙ මණ්ඩුකගේ චරිතෙට මාරු උනා සුපින්වතුනි.... දෙබස් විදියට කියන්න ගියොත් කතාව ගොඩක් දිග්ගැස්සෙන හින්ද කෙටියෙන් කියන්නම් මචං.....
යාලුව සමන්ට කිවුව විදියට සමන් හොාටල් රූම් එකක තමන්ගෙ පෙම්වතිය එක්ක දාපු සෙල්ලන්ටික හිඩ්න් කැම් එකකින් රෙකෝඩ් කරල.. ඊට පස්සෙ නෙට් එකට දාල..... හෙනගහන වැඩ මේවනම්....
දැන් සමන් තමන්ගෙ දුක්ඛදායක කතාව හෑඬූ කඳුලින් යුතුව යාලුවට පවසනව.... තමන් පත්වෙලා ඉන්න අසරන තත්වෙන් ගොඩඑන්න උදවු කරන්න කියල යාලුවගෙන් ඉල්ලනව.....
කොච්චර කුප්ප යාලුවෙක්ගෙ උනත් හදවත උනු වෙනව ඒ කතාව අහන් ඉද්දි....
මිතුරු තුමෝ දුක සැප දෙකෙහිම පැවතී
බිතු සිතුවම් රූ මෙන් පිටුනොපාවිතී....
සමනො මගෙ ආලුවෙක් ඉන්නව... කම්පියුටර් කාපු එකෙක්... මන් ඌට කතා කරල වීඩියෝ එක අයින් කරන්න විදියක් තියේද කියල බලන්නං.......
අනේ මචං.. ලොකු දෙයක් මචං... අනේ බං... මොනවහරි කරලදීපන්....
හරි බං... ඌ මට ඕනි උදවුවක් කරනව.... මං කතාකරල බලන්නම්.... මේ ඒක නෙමේ මේව නිකම් කරන්න බෑ පුතෝ... බෝතලයක් ඕනි....
හරිබං..... බෝතලේට බෝතල් දහයක් දෙන්නම්....
එදා රාත්‍රිය සමන්ට නිදි නොමැති රාත්‍රියක් උනා... යන්තම් ඇහැ පියවෙද්දි සමන්ට හීනෙන් පෙනුනෙ කෙල්ලගෙ අයියල දෙන්න ඇවිත් තමන්ව පෙති පෙති කපන හැටි.......
පහුවදා වෙනද වගේම ඉරපායල වෙනදට වඩා හිමීට හවස් උනා.... සමන්ගෙ යාලුවගෙ කම්පියුටර් වැඩ්ඩ වීඩියෝ එක කාටවත් බලනින බැරි වෙනින බ්ලොක් කලා කියල යාලුව කෝල් කරල සමන්ට කවුවම සමන්ගෙ ඇඟට ලේ ඩිංගක් ඉනුව.......
එදා හවස කට්ටියට සමන් ගානෙ පාටියක්... ගැලරි බෝතලයක්, සෝඩ, ඩෙවල්, ඔම්ලට්, බැදපු මාලු, සිගරැට් සේරම සමන් ගානෙ...
නැවගිලිච්ච කැප්ටන් ගහෙන් වැටුනම ගොනා ඇනල ඉස්පිරිතාලෙ ගෙනිච්චම දොස්තරල ස්ට්‍රයික් කරල වගේ සමන්ගෙ මූන.... ඇත්තටම පවු සමන්..... හෝටල් කාරය කොටල මරනවමයි කියල සමන් හිතාගත්ත...
සමන්ගෙ යාලුව සමන්ට උන පොරොන්දුව අකුරටම රැකල තිබුන... ඌ වෙන කාටවත් සීන් එක කියල තිබුනෙ නෑ..... එාහම බැලුවම මේවගෙ අවංක යාලුවන්ට අරක්කු ගැලුමක් අරන් දුන්නත් පවු නෑ කියල සමන්ට හිතුන.....
සාදය සුපුරුදු පරිදි ගලාගෙන ගියා.... සමන් මුක පූට්ටුවක් දාගෙන හිටියට අනෙක් උන්ට ගානක් උනේ නෑ.....
සමන්ගෙ යාලුව අනිතිම ශොට් එකත් දාගෙන අනිතිම සිගරැට් එකත් ටොක් ටොක් ගාල තට්ටු කරල පත්තු කරල පපුව පිරෙන්න දුම් උගුරක් ඇදල දුම් ගුලි හිමීට පාකරන ගමන් සමන්ට කතාකලා....
මචං සමන්... මෙහෙම කිවුවට අවුලක් ගන්න එපා බං...... එහෙම වීඩියෝ එකක් මං දැකකෙ නෑ බං, අපි මේ උඹගානෙ බෝතලයක් ගහන්ඩ පොඩි ප්ලෑන් එකක් ගැහුවෙ.... දැන්වත් උඹේ ඔය වැදි බන නවත්තගං......
Upasaka baka baka ra koppa deka deka
ReplyDelete