Thursday, April 11, 2019

මතක.................

ඉතිං මචං කොහොමද.... වසර ගනනක පැරනි මිතුදම අලුත් කරමින් මම ඔහුගෙන් ඇසුවෙමි... ජීවිතයේ නොයෙක් දුක් කම්කටොලු විසින් ඔහුගේ බාහිර පෙනුමේ වෙනස්කම් රාශියක් සිදුකර තිබුනද ඔහු සතුව තිබු අවංක කමට කිසිඳු හානියක් සිදුකර නොතිබුනු බැවින් පිලිතුර ඉතා අවංක විය... එදින හවස්වරුවේ මා හටද වැඩක් නොතිබුනු බැවින් ටික වේලාවකින් අප දෙදෙනා අසල පිහිටි අවන්හලක අසුන්ගෙන සිටියෙමු....
ඔහු කුඩා කාලයේ මා සමග හැදුනු එකෙකි.. වසර 15කට පමන පෙර ගම හැර ගියෙන් අපේ ඇසුර නැවතුනද හිතේ තිබුන මිතුදම අපූරුවට සුරැකිව තිබුනි... මා 5 වසරෙන් ශිෂ්‍යත්වය සමත්ව වෙනත් පාසලකට මාරුවී ගිය අතර ඔහු 7 වසරෙන් පාසල් ජීවිතයට සමුදී තිබුනි... අද නැවත අප දෙදෙනා නැවත එක මේසයක එකට වාඩිවි සිටිමු.....
මොනවද බොන්නෙ... බියර් එකක් ගහමු.. උඹ ගොඩක් දුර ගන්නත් ඕනනෙ... උගේ යෝජනාව ස්තීරවූයෙන් අප දෙදෙනා බියර් උගුරු පහලට යවමින් කතාවට වැටුනි.... ඔහුගේ දොඩමලුව තව තවත් අවංක කරමින් බොතල් සෙමෙන් හිස් වෙයි....
ඔහුගේ අත්දැකීම් පොලිසිය, රිමාන්ඩ් එක, පාතාලය ආදී නොයෙක් තැන්හි සැරි සරමින් වචන වලට පෙරලෙයි.. මම අසා සිටිමි....
දැන් අක්ක කොහෙද බං ඉන්නෙ....
අපේ ගේ එහා පැත්තෙ අක්කත් පොඩියට ගෙයක් හදන් ඉන්නව බං.. සල්ලි ටිකක් සෙට් උන ගමන් වහලෙට ටකරන් ටිකක් දාල දෙන්න ඕනෙ.. පවුබං... වැස්ස දවසට හැම තැනම තෙමෙනව....
දැන් ලමයි එහෙමත් ඇති නේද...
ඔවු බං.. තුන්දෙනෙක් ඉන්නව.. ලොකු එකී මේ පාර විබාගෙ ලියනව.. අර කැරිය අක්කව දාල වෙන ගෑනියෙක් අරන් පැනල ගියා බං.... දැන් අක්ක පුලුවන් විදියට ලමයි ටික හදන් ඉන්නව....
ජොබ් එකක් කරනවද..
එහෙම හරි ජොබ් එකක් නැහැ බං.. ගෙදරක වැඩට යනව... ඒ ගෙදර නාකි පොර අක්කව තියන් ඉන්නව...
ඉතිං උඹල මොනාත් කේස් දාන්නෙ නැද්ද...
අපි මොනවට කේස් දාන්නද බං.. ඒකි ලමයින්ට කන්න දෙන්නනෙ හැමදේම කරන්නෙ... අක්ක හවසට ටවුන් එකෙත් බහිනව...
අහන්නට ප්‍රස්නයක් හෝ දෙන්නට පිලිතුරක් නොමැති වූ මා බියර් උගුරු දෙක තුනක් ගිල ඔහු දෙස බැලීමි.. ඔහු සතුටක් හෝ දුකක් නොමැතිව ඈත බලා සිටියේය...
දෛවය අප දෙදෙනාට දෙවිදියකට සලකා තිබුනි.....
මොකක්දො වචන වලට හරවා ගත නොහැකි හැඟිමකින් ම සිත වෙලී යන බව දැනුනෙන් මම තවත් බෝතලයක් හා දුම්වැටි දෙකක් ඇණවුම් කලෙමි....

No comments:

Post a Comment