නම් තැබීම...

කලකට ඉහත දවසකි.. අම්මා කොහෙන්දෝ පූස් පැටවෙකු ගෙනාවාය.. තොරක් නැති මී කරදරයෙන් බේරෙන්නට ඇය ගත් ක්‍රියාමාර්ගයකි එය..

ඒකා සුදුම සුදුය.. පුලුන් බෝලයක් මෙනි.. නිල්පාට ඇස්ය.. රෝසපාට නහය.. හුරතල් පාටය..

මම බලලුන්ට අකමැත්තෙමි.. නමුත් මේකාගේ හුරතලය නිසාම පැය කිහිපයකින් මම උගේ සුරතල් බලාසිටින්නෙකු වීමි..

දිනෙන් දින උගේ දඟ වැඩ වැඩිවිය.. අම්මාගේ ආදර සත්කාර අපට වඩා ඌට ලැබෙයි.. බඩපුරවාගත් පැටියා එහෙ දුවයි, මෙහෙ දුවයි, වෙිගයෙන් දුවගොස් කෙසෙල් ගසක් මුදුනේ නවතියි.. ඥාවු ගාමින් බිත්ති දිගේ යයි.. ඉඳහිට සරමේ එල්ලී ඔංචිලි පදින්නටද සැරසෙයි.....

දින කිහිපයක් මෙසේ මේකා අප ඇසුරේ සුවසේ වැඩුන මුත් ඌට නිත්‍ය නමක් ලබාදීමේ උවමනාවක් කාටත් නොවිය.. එවෙලෙට හිතෙන නමක් කියා කතාකලවිට ඌ එයි..

මූට ගැලපෙන නමක් තැබිය යුතු බව මට සිතුනි.. නම් කිහිපයක් හිතට ආ මුත් ඒවාට අම්මාත් අනෙක් අයත් අකමැති විය.. එබැවින් වාග් විද්‍යානුකූලව සලකා බලා, ගන පිහිටුවා මුගේ චර්යා රටාවටද ගැලපෙන නමක් තැබිය යුතුය...

ඌ කිරිසුදු පාට බැවින් පලමුව උගේ පාට සහ උගේ ආහාර රුචිය සලකා "කිරි" යන පදය ගතිමි.. දෙවනුව ඌ බලලෙකු නිසා ඉංගිරිසියෙන් වූව හඳුන් වන cat යන පදය ගෙන එය "කැටියා" ලෙස සිංහලය පෙරලා ගතිමි..

පද දෙක එක්කලවිට "කිරිකැටියා" ලෙස අපූරු නමක් ලැබුනි...

අම්මා ඒ නමටද අකමැතිය.. නම දිග වැඩිලු.. කියන්න අමාරුලු..

කෙසේ නමුත් මටද පරාජය බාර ගත නොහැකි බැවින් හා මාගේ මහන්සිය අපතේ හැරිය නොහැකි වූ බැවින් මම සරල පද පෙරලියක් කලෙමි.. එනම් "කිරිකැටියා" යන්න තුන් තේරවිල්ලක් තොරන ලෙසට පද පෙරලි කිරීමයි...

අහෝ.. වාසනාවකි.. මගේ මහන්සිය අපතේ ගොස් නැත.. උගේ චරියා රටාවට අපූරුවට ගැලපෙන, ඌට ලබාදිය හැකි හොඳම නම එවිට මට ලැබුනි..

කෙසේ නමුත් ඒ නම එලෙසින්ම ප්‍රසිද්ධියේ බාවිතා කල නොහැකි නිසාත්, අම්මා ඒ නමට නම් කොහෙත්ම කැමති නොවන නිසාත් මම ඒ නමේ අග කොටස පමනක් ගතිමි.. ඒ "කිටියා" ලෙසය..

කිටියා......

අවසානයේ ඒ නම රෙජිස්ටර් විය...

ඌ ඉක්මනින් තරුණ වියට එලඹුනු අතර ඌ දෙදින, තුන්දින නිල සංචාර වලට සහභාගි වී දැලි, කුනු, මඩ තවරගෙන ගෙදර ඒමට පුරුදු විය... අහල පහල බැලලියන්ගේ පැටවුන් කිටියා මෙන් සුදෝ සුදු වීමෙන් නම් තැබීමේදී මා ඌට සුදුසුම නම ලබා දී ඇති බව කාටත් කල්යාමේදී අවබෝධවිය..............